ვენაში, დასავლეთ ევროპის, სამხრეთ კავკასიისა და ცენტრალური აზიის ქალ მშვიდობის მშენებელთა და მედიატორთა ქსელის რეგიონული კონფერენცია მიმდინარეობს. კონფერენციის ორგანიზატორები არიან  ქალ მშვიდობის მშენებელთა გლობალური ქსელი (GNWP) და ევროპის უშიშროებისა და თანამშრომლობის ორგანიზაცია (OSCE). კონფერენციას საქართველოდან "ქალთა საინფორმაციო ცენტრის" გამგეობის თავმჯდომარე, ელენე რუსეცკაია, ფონდ "სოხუმის” ხელმძღვანელი ალა გამახარია და ასოციაცია "თანხმობის"  გამგეობის თავმჯდომარე, იულია ხარაშვილი ესწრებიან. 

კონფერენცია მიზნად ისახავს ისეთი პლატფორმის არსებობას, სადაც ქალებს უშუალო ადვოკატირების შესაძლებლობა ექნებათ, რათა ხელი შეუწყონ WPS-ის ინიციატივების ეფექტიან განხორციელებას შესაბამის რეგიონებში. 

კონფერენციის ფარგლებში, GNWP წარადგენს კონკრეტულ რეკომენდაციებსა და ადვოკატირების სტრატეგიას, რომელიც დაფუძნებულია კვლევებსა და კონსულტაციებზე. ეროვნული, რეგიონული და საერთაშორისო პოლიტიკის შემქმნელებთან კონსტრუქციული დიალოგის მეშვეობით, მონაწილეები დასახავენ კონკრეტულ სტრატეგიულ ქმედებებს, რეკომენდაციების შესასრულებლად. კონფერენციის მიზანს წარმოადგენს, ასევე, თანამშრომლობის გაძლიერება და საერთო პრიორიტეტების იდენტიფიცირება ქალ მშვიდობის მშენებლებსა და მედიატორებს შორის “ქალები, მშვიდობა და უსაფრთხოების”  დღის წესრიგთან დაკავშირებული გამოწვევების გადასაჭრელად აღმოსავლეთ ევროპაში, სამხრეთ კავკასიასა და ცენტრალურ აზიაში.  ამასთან, პლატფორმა მნიშვნელოვანია მონაწილეებისთვის, დაამყარონ პარტნიორობა და თანამშრომლობა ეროვნულ, რეგიონულ და საერთაშორისო დონეზე. 

კონცეფციაში ხაზგასმულია, რომ ქალთა ხელმძღვანელობით სამშვიდობო ქსელები გადამწყვეტ როლს ასრულებენ მდგრადი და ინკლუზიური მშვიდობის წინსვლის პროცესში, კოლექტიური ადვოკატირების საქმეში, ცოდნის გაზიარებისა და კონფლიქტით და კრიზისით დაზარალებული თემებში ადგილობრივი სამოქალაქო საზოგადოების აქტორების გაძლიერების მიმართულებით. აღნიშნულია ისიც, რომ მხარდაჭერის მიუხედავად, ამ ქსელებს ექმნებათ სხვადასხვა დაბრკოლება, მათ შორის შეზღუდული დაფინანსების კუთხით. ეს და სხვა გამოწვევები კი ქმნის სტრუქტურულ ბარიერებს სამოქალაქო საზოგადოების ორგანიზაციებს შორის თანამშრომლობისთვის და ხელს უშლის სამშვიდობო ქსელების მდგრადობას.

ასევე ნათქვამია, რომ ქსელების მნიშვნელობა განსაკუთრებით აქტუალურია აღმოსავლეთ ევროპაში, სამხრეთ კავკასიასა და ცენტრალურ აზიაში, სადაც ორმოცზე მეტი ქალთა სამშვიდობო ქსელი ფუნქციონირებს.