4 ივლისს დაუდგენელმა შეიარაღებულმა პირებმა სასტიკად სცემეს ცნობილი ჟურნალისტი და უფლებადამცველი, ელენა მილაშინა და ადვოკატი ალექსანდრე ნემოვი.

ელენა მრავალი წლის განმავლობაში „ნოვაია გაზეტა“-ში მუშაობდა (სანამ გამოცემა შეწყვეტდა არსებობას). ის უმეტესწილად, ჩეჩნეთის რესპუბლიკაში მომხდარ უფლებადარღვევებს იძიებდა და არასამართლებრივი სიკვდილით დასჯის ფაქტებს აშუქებდა. ასევე, ასაჯაროვებდა ჩეჩენი გეების დევნასა და წამების ფაქტებს.

აღსანიშნავია, რომ ეს  თავდასხმა პირველი არ ყოფილა, - 2020 წლის თებერვალში ელენა და ადვოკატი მარინა დუბროვინა სცემეს გროზნოში, სადაც ისინი ვიდეოს „როგორ ცხოვრობენ კადიროვი და მისი თანამოაზრეები“ ავტორის სასამართლო პროცესზე დასასწრებად ჩავიდნენ.

ამასთან, 2020 წელს რამზან კადიროვი სოციალურ ქსელში მილაშინას მოკვლითაც კი დაემუქრა. ელენას გამხდარა ცილისწამების მსხვერპლიც.

სასტიკად ნაცემი ელენა და ალექსანდრი, ამჟამად ბესლანში გადაჰყავთ. ორივეს მრავლობითი დაზიანება აღენიშნება და  მათი მდგომარეობა მძიმეა. ჟურნალისტს რამდენიმე თითი აქვს მოტეხილი და მან რამდენჯერმე გონება დაკარგა, ხოლო ფეხში დაჭრილი ალექსანდრი კი ეტლში ზის.

უფლებადამცველების თქმით, ნემოვისა და მილაშინას მანქანას შეიარაღებულმა პირებმა გზა, აეროპორტიდან გროზნოსკენ მიმავალ ტერიტორიაზე გადაუღობეს. შენიღბულმა თავდამსხმელებმა მილაშინა და ნემოვი წიხლებითა და იარაღის კონდახებით სცემეს. ამასთან, გაანადგურეს დოკუმენტები და აღჭურვილობა და შუბლზე ცეცხლსასროლი იარაღიც მიადეს.
„როცა სცემეს, უთხრეს: ჩვენ გაგაფრთხილეთ. წადი აქედან და აღარაფერი დაწერო“, - ნათქვამია მემორიალის განცხადებაში.
დაზარალებულების დასაკითხად საავადმყოფოში პოლიცია მივიდა, თუმცა მათ უარი განაცხადეს ჩვენების მიცემაზე, რადგან „აზრი არ აქვს“.
თავდასხმის დეტალებს რუსეთის ჟურნალისტთა კავშირი და ადამიანის უფლებათა დაცვის საბჭო იძიებენ. 
უფლებადამცველმა, ტატიანა მოსკალკოვამ განაცხადა, რომ მან გროზნოში ჟურნალისტისა და ადვოკატის ცემის შესახებ გაავრცელა ცნობა, შემდეგ კი რუსეთის ფედერაციის საგამოძიებო კომიტეტსა და ჩეჩნეთის პროკურატურას მიმართა.
”მე დავუკავშირდი ჩვენს ადამიანის უფლებათა საკითხებზე პასუხისმგებელ პირს (ჩეჩნეთში), ვთხოვე, ყველაფერი გაეკეთებინათ დაზარალებულების უსაფრთხოების უზრუნველსაყოფად, დახმარებოდნენ მათ ტრანსპორტირებასა და სამედიცინო დახმარების მიღებაში,” განუცხადა მოსკალკოვამ ინტერფაქსს.

ომბუდსმენმა ასევე აღნიშნა, რომ მილაშინასა და ნემოვის უსაფრთხოებას „სრულიად უზრუნველყოფენ“.

ინციდენტის შემდეგ, ფედერაციის საბჭოს საკონსტიტუციო კანონმდებლობისა და სახელმწიფო მშენებლობის კომიტეტის ხელმძღვანელმა, ანდრეი კლიშასმა, სამართალდამცავ ორგანოებს თავდასხმაზე მკაცრი რეაგირება მოსთხოვა; სახელმწიფო სათათბიროს საინფორმაციო პოლიტიკის კომიტეტის ხელმძღვანელმა ალექსანდრ ხინშტეინმა ჟურნალისტებზე თავდასხმებს "კრიმინალური და მიუღებელი" უწოდა.

ჩეჩნეთის რესპუბლიკის მთავრობას კი, ამ დრომდე განცხადება არ გაუკეთებია.