2022 წელს, საქართველოში რეგისტრირებული 54 435 დანაშაულიდან, 4 106 ოჯახში ძალადობის შემთხვევებს უკავშირდება. შსს-ს სტატისტიკის მიხედვით, გასულ წელს ჩადენილი ყველაზე მეტი დანაშაული ქურდობაზე მოდის, ოჯახში ძალადობის შემთხვევებს კი სტატისტიკით, მეორე ადგილი უკავია. უწყების მონაცემების თანახმად, პოლიციამ ოჯახში ძალადობის აღრიცხული 4 106 ფაქტიდან, 3 586 საქმე გახსნა.
გასულ წელსვე აღირიცხა მუქარის 3 699 შემთხვევა, რომელთაგან 3 180 საქმეა გახსნილი. ამასთან, 2022 წელს დაფიქსირდა გაუპატიურების 176 შემთხვევა, გაიხსნა 123. "ამასთან, რეგისტრირებულ დანაშაულთა შორისაა სიცოცხლის წინააღმდეგ მიმართული დანაშაულის 1470 შემთხვევა, საიდანაც 212 გაიხსნა. მათ შორისაა განზრახ მკვლელობისა და დამამძიმებელ გარემოებებში განზრახ მკვლელობის, შესაბამისად, 42 და 32 ფაქტი, საიდანაც სამართალდამცველებმა ჯამში 68 გახსნეს. ამასთან, აღირიცხა მკვლელობის მცდელობისა და დამამძიმებელ გარემოებებში მკვლელობის მცდელობის, შესაბამისად, 74 და 47 შემთხვევა, საიდანაც ჯამში 117 დანაშაული გაიხსნა. ასევე, რეგისტრირებულია თვითმკვლელობამდე მიყვანის 1070 შემთხვევა - გაიხსნა 21."
აღსანიშნავია, რომ წინა წლის ანალოგიურ მაჩვენებელთან შედარებით, რეგისტრირებულ დანაშაულთა რაოდენობა 3.39%-ით არის შემცირებული. გაზრდილია დანაშაულთა გახსნის მაჩვენებელი - 2021 წლის იანვარ-ივლისში სამართალდამცავმა ორგანოებმა აღრიცხული 56343 დანაშაულიდან 49.82% გახსნეს.