გენდერული ძალადობის წინააღმდეგ 16-დღიანი კამპანიის ფარგლებში, ქალთა საინფორმაციო ცენტრის (WIC), ხაშურის მუნიციპალიტეტის მერიისა და გენდერული თანასწორობის საბჭოს ერთობლივი ინიციატივით, ხაშურში სამუშაო შეხვედრა ჩატარდა.

ღონისძიება ქალთა საინფორმაციო ცენტრის პროექტების მენეჯერმა, თეონა ჩიქოვანმა გახსნა. 

სამუშაო შეხვედრის ფარგლებში, WIC-ის მიერ ქალთა პოლიტიკური მონაწილეობის, გენდერული სტერეოტიპებისა და ქალთა მიმართ ან/და ოჯახში ძალადობის საკითხებზე ხუთ მუნიციპალიტეტში ჩატარებული კვლევის პრეზენტაცია გაიმართა.

კვლევა წარადგინეს: ლელა ხომერიკმა და მაია კუპრავა-შარვაშიძემ. ექსპერტებმა ქალების პოლიტიკური მონაწილეობის ზრდა, გენდერული კვოტირების მექანიზმის პოზიტიური გავლენა პოლიტიკურ ცხოვრებაზე და მავნე გენდერული სტერეოტიპების შემცირებული დინამიკა განიხილეს.

ღონისძიებას მუნიციპალიტეტის გადაწყვეტილების მიმღები პირები,  ხაშურის გენდერული საბჭოს და საკრებულოს, მათ შორის, ამერიკის კუთხის წევრები და სამოქალაქო სექტორის წარმომადგენლები ესწრებოდნენ.

პრეზენტაცია დისკუსიის რეჟიმში გაგრძელდა. დამსწრეებმა კვლევის შესახებ მათი შეფასებები გააზიარეს და ამასთან, ქალთა ეკონომიკური გაძლიერების მიღწევის გზებსა და მომავალი თანამშრომლობის გეგმებზე იმსჯელეს.

პროექტის მიზანია კვლევებზე დაფუძნებული საინფორმაციო კამპანიის წარმოება. ქალთა საინფორმაციო ცენტრმა კვლევა ხაშურში, ბოლნისში, ქედაში, ზუგდიდსა და ხარაგაულში ჩაატარა. 

კვლევა ჩატარებულია პროექტის ფარგლებში „ქალთა გაძლიერება და სრულფასოვანი მონაწილეობა ადგილობრივი პოლიტიკის განხორციელებაში“, რომელიც დანიური ორგანიზაცია KVINFO -სა და დანიის საგარეო საქმეთა სამინისტროს მხარდაჭერით ხორციელდება.