ევროკომისიის პრეზიდენტი ურსულა ფონ დერ ლეიენი აცხადებს, რომ თურქეთში მომხდარი ინციდენტი, რომლის დროსაც სკამის გარეშე დარჩა, მის სქესს უკავშირდება.

„მე ევროკომისიის პირველი ქალი პრეზიდენტი ვარ. ევროკომისიის პრეზიდენტი ვარ და ველოდი, რომ ორი კვირის წინ თურქეთში ვიზიტის დროს ისე მომექცეოდნენ, როგორც ევროკომისიის პრეზიდენტს, მაგრამ ეს ასე არ იყო. ვერ ვპოულობ იმის გამართლებას, როგორ მომექცნენ. დავასკვენი, ეს იმიტომ მოხდა, რომ ქალი ვარ. მოხდებოდა ეს, კოსტუმით და ჰალსტუხით რომ ვყოფილიყავი? ვიგრძენი წყენა და თავი მარტო ვიგრძენი, როგორც ქალმა და როგორც ევროპელმა,“ - აღნიშნა ევროკომისიის პრეზიდენტმა.

შეგახსენებთ, აპრილის დასაწყისში ანკარაში თურქეთის პრეზიდენტი რეჯეფ თაიფ ერდოღანი შარლ მიშელსა და ურსულა ფონ დერ ლაიენს შეხვდა. შეხვედრების ოთახში, ევროკავშირისა და თურქეთის დროშებთან, მხოლოდ ორი სკამი იდგა, რომლებზეც ერდოღანი და მიშელი დასხდნენ. სკამის გარეშე დარჩენილ ფონ დერ ლეიენს კი დივანზე მოუწია დაჯდომა.