2020 წელს „გლობალური მშვიდობის ინდექსში“ საქართველო ოთხი პოზიციით დაწინაურდა და 163 ქვეყანას შორის 95-ე ადგილი დაიკავა. ორგანიზაციის ანგარიშში წერია, რომ შრი-ლანკასთან ერთად საქართველო მსოფლიოში ერთ-ერთი ქვეყანაა, რომელიც 2008 წლის შემდეგ 20%-ით უფრო მშვიდობიანი გახდა.
ანგარიშის თანახმად, „გლობალური მშვიდობის ინდექსის“ რეიტინგში სომხეთი 99-ე, აზერბაიჯანი - 120-ე, თურქეთი 150-ე, რუსეთი კი 154-ე ადგილზეა. მსოფლიოში ყველაზე მშვიდობიანი ქვეყნები კი ისლანდია, ახალი ზელანდია და პორტუგალიაა.
გლობალური მშვიდობის ინდექსი ეკონომიკისა და მშვიდობის ინსტიტუტის მიერ შემუშავებული მეთოდია, რომელიც სხვადასხვა ინდიკატორების საშუალებით მსოფლიოში მშვიდობიანობის დონეს ზომავს. ინდექსის შედგენისას გათვალისწინებულია ისეთი ინდიკატორები, როგორიცაა კრიმინალის აღქმა, მკვლელობები, დაპატიმრებული მოსახლეობა, იარაღის ხელმისაწვდომობა, ორგანიზებული კონფლიქტი (შიდა), ძალადობრივი დენოსტრაციები, პოლიტიკური არასტაბილურობა, პოლიტიკური ტერორი, იარაღის იმპორტი, ტერორისტების აქტივობა, სიკვდილიანობა კონფლიქტისას (შიდა), სამხედრო დანახარჯები, შეიარაღებული სერვისის პერსონალი, გაეროს მშვიდობისმყოფლების დაფინანსება, ბირთვული და მძიმე შეიარაღება, იარაღის ექსპორტი, ადგილნაცვალი პირები, ურთიერთობები მეზობელ ქვეყნებთან, საზოგადოების ერთიანობა და ადამიანის უფლებების დაცვა.