იაპონიის ორი უმსხვილესი ავიაკომპანია All Nippon Airways და Japan Airlines-ი, რომელიც ამ დრომდე მკაცრი დრეს-კოდით იყო ცნობილი, ქალ ბორტგამცილებლებს ჩაცმაზე შეზღუდვებს უხსნის. ავიაკომპანიებში ქალ თანამშრომლებს მაღალქუსლიანი ფეხსაცმლით უნდა ემუშავათ, თუმცა ბორტგამცილებლებს არჩევანის თავისუფლება მისცეს და ამით კომპანიებმა სცადეს მათთვის მოხერხებული სამუშაო გარემო შეექმნათ.

თუმცა, ბორტგამცილებლებისთვის კვლავ აკრძალულია სპორტული ფეხსაცმლის ტარება.

ავიაკომპანიების პოლიტიკის ცვლილება განპირობებულია იაპონური სოციალური მოძრაობის #KuToo-ს მოთხოვნით, რომლის წევრებიც  სამუშაო ადგილზე ქალთა უფლებებისთვის იბრძვიან. მოძრაობის სახელი #KuToo იაპონური "kutsu" -დან (ფეხსაცმელი) მოდის და ეხმიანება საერთაშორისო  მოძრაობას სექსუალური ძალადობის წინააღმდეგ #MeToo.

იაპონია ჯერ კიდევ საკმაოდ კონსერვატიულია სამუშაო პირობების საკითხებში. ბევრი კომპანია მოითხოვს თანამშრომლებისგან დრეს-კოდის დაცვას. ზოგიერთ კომპანიაში კი შიდა წესები არეგულირებს თანამშრომლების თმისა და ფრჩხილების სიგრძეს.