ოთხმა გოგონამ, ოთხმა იურისტმა და ოთხივე - მარიამმა: მარიამ თითბერიძემ, მარიამ ცერცვაძემ, მარიამ ჯორბენაძემ და მარიამ ჩაკვეტაძემ მოხუცების დასახმარებლად ბრძოლა დაიწყეს და სოციალურ ქსელ „ფეისბუქში“ შექმნეს საინიციატივო ჯგუფი – „დავეხმაროთ მოხუცებს“. იმისთვის, რომ შექმნილი რთული ვითარება მოხუცებისთვის გამარტივდეს, ჯგუფის წევრებმა მათი დახმარება გადაწყვიტეს. მალევე ფეისბუქ-ჯგუფს 15 000-ზე მეტი ადამიანი შეუერთდა. მეგობრების, თანამოაზრეების ჩართულობით, უმოკლეს დროში - 24 საათში მათ შეძლეს 55 ათას 500 ლარის შეგროვება და თბილისში მცხოვრები 600-მდე ხანდაზმული ადამიანის პროდუქტით, მედიკამენტებით, ჰიგიენის საშუალებებით უზრუნველყოფა.
ხანდაზმული ადამიანები Covid-19-ის რისკ-ჯგუფს წარმოადგენენ - ახალი კორონავირუსი ყველაზე დიდ საფრთხეს სწორედ მათ ჯანმრთელობას და სიცოცხლეს უქმნის.
თვითიზოლაციის გადაწყვეტილება ბევრ მოხუცს საკვების პრობლემას უქმნის - დაიხურა "კათარზისი", რომელიც სოციალურად დაუცველ ხანდაზმულ ადამიანებს საკვებით უზრუნველყოფდა.
ინიციატივას „დავეხმაროთ მოხუცებს“ მრავალი კომპანია შეუერთდა. აღსანიშნავია, რომ კამპანიაში თბილისის მერიაც ჩაერთო.